Birgir Steinn og félagar í góðum málum

Birgir Steinn Jónsson og félagar hjá IK Sävehof eru komnir í vænlega stöðu í rimmu sinni við Hammarby eftir annan sigur í átta liða úrslitum sænsku úrvalsdeildarinnar í handknattleik, 28:26, á heimavelli í kvöld. Þriðja viðureign liðanna fer fram í Stokkhólmi á mánudaginn. Hammarby þarf á sigri að halda til þess komast hjá sumarleyfi eftir tap í tveimur fyrstu leikjunum.

Birgir Steinn skoraði þrjú mörk á heimavelli í kvöld. IK Sävehof var fimm mörkum yfir þegar fyrri hálfleikur var að baki.

Tveir sigurleikir IK Sävehof hafa komið mörgum á óvart því liðið hafnaði í sjötta sæti en Hammarby varð í þriðja sæti í deildarkeppninni.