Staða Bjarka Elíssonar og samherja í ungverska meistaraliðinu Telekom Veszprém vænkaðist mjög í toppbaráttu úrvalsdeildarinnar heima fyrir í gær. Ekki aðeins vann Veszprém sinn 14. leik í röð heldur tapaði helsti andstæðingurinn, Pick Szeged, sínum öðru leik í deildinni á sama tíma. Þar með hefur Veszprém fjögurra stiga forskot í efsta sæti. Liðið hefur 28 stig en Pick Szeged 24.
Bjarki Már skoraði þrjú mörk í öruggum sigri, 36:23, í heimsókn til Csurgói KK. Staðan að loknum fyrri hálfleik var 21:10. Nedim Remili, sem valinn var mikilvægasti leikmaður Evrópumóts landsliða sem lauk um síðustu helgi, skoraði fjögur af mörkum Veszprém en að vanda var leiktímanum skipt bróðurlega á milli leikmanna liðsins.
Szeged tapaði fyrri Gyongyosi, 35:32, á útivelli eftir að hafa átt undir högg að sækja allan leikinn. Gyongyosi, sem fluttist upp í sjöunda sæti deildarinnar með þessum sigri, var þremur mörkum yfir í hálfleik, 18:15.
Á undanförnum árum hafa Veszprém og Pick Szeged yfirleitt ekki tapað nema hvort fyrir öðru og á þeim úrslitum hefur ráðist hvort liðanna hefur unnið deildina og síðar úrslitakeppnina.
