Bjarni og Dagur eru væntanlegir til Búdapest

Guðmundur Þórður Guðmundsson, landsliðsþjálfari í handknattleik karla hefur ákveðið að fá Dag Gautason, leikmann Stjörnunnar, og Bjarna Ófeig Valdimarsson, leikmann FK Skövde HK, til móts við landsliðið sem tekur nú þátt í Evrópumeistaramótinu í Ungverjalandi.

Dagur og Bjarni koma til Búdapest í kvöld og í fyrramálið, eftir því sem Handknattleikssamband Íslands greinir frá í tilkynningu í kvöld. Þeir ættu að vera klárir í leikinn gegn Svartfellingum í lokaumferð milliriðlakeppni Evrópumótsins.

Hvorki Bjarni Ófeigur né Dagur eiga að baki A-landsleik.

Með komu þeirra verða 26 leikmenn í hópnum ytra, þar af eru 11 í einangrun. Hugsanlega losnar einhver þeirra fyrir hádegið á morgun. Ekki er á vísan róið í þeim efnum eins og dæmin sanna.