Landsliðsmarkvörðurinn Björgvin Páll Gústavsson hefur verið ráðinn aðstoðarþjálfari karlaliðs Vals í handknattleik. Hann verður þar af leiðandi nýráðnum aðalþjálfara Vals, Óskari Bjarna Óskarssyni, innan handar á komandi tímabili.
Björgvin Páll verður áfram aðalmarkvörður Vals samhliða nýju hlutverki innan liðsins.
Björgvin gekk til liðs við Hlíðarendafélagið sumarið 2021 frá Haukum og var um leið fenginn í þjálfarateymið ásamt því að verja mark Vals.
Björgvin Páll er 38 ára gamall og þrautreyndur handknattleiksmaður. Landsleikirnir eru liðlega 250 á nærri 20 ára tímabili. Hann hefur tekið þátt í öllum stórmótum íslenska landsliðsins frá og með Ólympíuleikunum í Bejing 2008. Auk Vals hefur Björgvin Páll leikið með liðum nokkurra félaga hér heima, s.s. HK, Fram, ÍBV og Haukum. Einnig hefur Björgvin Páll gert garðinn frægan með félagsliðum í Danmörku, Sviss og í Þýskalandi.
Um skeið hefur Björgvin Páll verið markvarðaþjálfari þýska liðsins Bergischer HC og var nýverið í æfingabúðum Japan með Degi Sigurðssyni þjálfara karlalandsliðs Japans.
