- Auglýsing -
Brasilíska tríóið sem samdi fyrir nokkru síðan við nýliða Harðar á Ísafirði fékk loks leikheimild í dag og getur þar af leiðandi sýnt hvað í því býr í kvöld þegar Hörður tekur á móti Selfossi í lokaleik 5. umferðar Olísdeildar karla í íþróttahúsinu á Torfnesi.
Jhonatan Cristiano Ribeiro Dos Santos, José Esteves Lopes Neto, Guilherme Carmignoli De Andrade munu vera hver öðrum snjallari og verður þar af leiðandi spennandi að sjá hvers þeir verða megnugir með Harðarliðinu.
Landi þremenninganna, Emanuel Evangelista markvörður, hefur þegar tekið þátt í tveimur leikjum með Herði.
Alls eru 12 erlendir leikmenn á samningi hjá Herði um þessar mundir og ljóst að forráðamenn félagsins ætla að tjalda öllu sem til er til að vera með í baráttu Olísdeildar karla.
Viðureign Harðar og Selfoss hefst klukkan 19 og er sýnd á youtuberás Harðar – Knattspyrnufélagið Hörður – en einnig verður textalýsing á handbolta.is.
- Auglýsing -
