Handknattleiksdeild KA/Þórs hefur gengið frá samningum við brasilískar systur, Nathália Fraga og Isabelle Fraga um að leika með liðinu í vetur.
Vonir standa til að Nathália Fraga geti spilað gegn Stjörnunni en verið er að klára síðustu pappírana tengt atvinnuleyfinu hennar. Hún hefur þó æft með liðinu síðustu vikur og mikil eftirvænting að fá hana inn í hópinn, segir í tilkynningu KA/Þórs.
Fjölhæfur leikmaður
Nathália, sem er 28 ára, hefur þann eiginleika að vera jafnhent og getur leyst af allar stöður fyrir utan sem og hornin bæði ef þörf krefur. Hún er reynslumikill leikmaður sem mun nýtast ungu og reynslulitlu liði KA/Þór vel á komandi vetri.
Sú yngri kemur síðar
Systir hennar, Isabelle, kemur síðan til liðs við KA/Þór um miðjan október þegar hún hefur lokið deildarkeppninni í Brasilíu. Isabelle er 21 árs miðjumaður og vinstri skytta og var viðloðandi yngri landslið Brasilíu.
Þrjár frá Brasilíu
Þar með verða þrjá brasilíska handknattleikskonur hjá KA/Þór þegar á tímabilið líður en fyrir er Nathalia Baliana. Hún gekk til liðs við KA/Þór á síðustu leiktíð.
Mikilvægur leikur á föstudaginn
KA/Þór er án stiga eftir þrjá leiki og fær Stjörnuna sem er í sömu sporum í heimsókn í KA-heimilið á föstudaginn klukkan 18.15 í fjórðu umferð Olísdeildar kvenna.
Staðan og leikjadagskrá Olísdeilda.
