Handknattleikssamband Íslands tók á móti leikmönnum og aðstoðarmönnum bronsliðs Íslands á heimsmeistaramótinu í handknattleik í Minigarðinum í Skútuvogi síðdegs í dag, rétt eftir að liðið kom til landsins með Icelandair frá Berlín. Foreldrar og aðstandendur leikmanna tóku á móti leikmönnum ásamt stjórnendum HSÍ.
Leikmenn fengu viðurkenningarvott frá HSÍ að lokinni stuttri móttöku athöfn. Óskaði formaður liðinu innilega til hamingju með stórkostlegan árangur á HM og bar hann þeim kveðju frá forseta Íslands og ráðherra.
Því næst var gestum boðið til veglegrar pizzuveislu áður en hver hélt til síns heima enda margir langir, erfiðir en árangursríkir dagar að baki hjá öllum í liðinu og teymi þess. Uppskeran var líka glæsileg, fyrstu verðlaun Íslands á heimsmeistaramóti í flokki 21 árs liða karla í þrjá áratugi.
Meðfylgjandi eru nokkrar myndir úr hófinu. Smellið á myndirnar til þess að sjá þær stærri.
