Fyrir viðureign Íslands og Bosníu í undankeppni EM karla 2026 sem fram fór í Laugardalshöll í gærkvöld heiðraði Handknattleikssamband Íslands Brynjólf Jónsson bæklunarlæknir fyrir ómetanlegt starf sitt fyrir sambandið og handboltahreyfinguna síðustu áratugi.
Brynjólfur hefur verið læknir landsliðanna í á fjórða áratug og farið á þeim tíma í ótal margar ferðir um allan heim, einkum með A-landsliði karla auk þess að vera óþreytandi við að aðstoða handknattleiksfólk á ferðlögum og jafnt sem dags daglega. Ævinlega til þjónustu reiðbúinn, einn ómetanlegra aðila sem koma að mikilvægu starfi en að sama skapi einn þeirra sem ekki fer mikið fyrir. Einn af mikilvægum mönnum handknattleikshreyfingarinnar á bak við tjöldin, svokölluðu.
Guðmundur B. Ólafsson formaður HSÍ afhenti Brynjólfi viðurkenningu og þakklætisvott, m.a. gjafabréf frá Icelandair, rétt áður en leikmenn liðanna voru kallaðir fram í salinn. Nærri 2.500 áhorfendur í Laugardalshöll risu úr sætum og klöppuðu lengi og innilega fyrir Brynjólfi sem var ekki á vaktinni á leiknum en örugglega á bakvakt ef þörf hefði verið á eins og hans er von og vísa.
