Handknattleiksmarkvörðurinn Sveinbjörn Pétursson er í liði 34. umferðar í þýsku 2. deildinni sem lauk um helgina. Sveinbjörn, eða Bubbi eins og hann er kallaður, fór hamförum í marki EHV Aue á laugardaginn þegar liðið vann Gummersbach í uppgjöri Íslendingaliða deildarinnar 29:26.
Bubbi kom í mark Aue-liðsins þegar talsvert var á fyrri hálfleik og gaf strax tóninn fyrir síðari hálfleik þar sem hann múraði fyrir markið sitt á köflum. Alls varði Sveinbjörn 14 skot og var með 48% hlutfallsmarkvörslu þegar upp var staðið. Skákaði hann öllum öðrum markvörðum deildarinnar með vasklegri frammistöðu sinni og verðskuldar svo sannarlega sæti í úvalsliðinu.
EHV Aue er í fjórða sæti deildarinnar þegar tvær umferðir eru eftir og ljóst að Rúnar Sigtryggsson hefur skilið við gott bú eftir að hafa hlaupið í skarðið sem þjálfari liðsins um fimm mánaða skeið.
Bubbi gekk til liðs við EHV Aue á síðasta sumri í stað Vilius Rašimas sem samdi við Selfoss. Samkvæmt tölfræði deildarinnar þá er Bubbi með 29,75% hlutfallsmarkvörslu á keppnistímabilinu.
