Annar úrslitaleikur Hauka og ÍBV um Íslandsmeistaratitilinn í handknattleik karla fer fram í kvöld á Ásvöllum. Flautað verður til leiks klukkan 18. ÍBV vann fyrstu viðureignina sem fram fór í Vestmannaeyjum á laugardaginn, 33:27, eftir að hafa tekið völdin síðustu 20 mínúturnar. Framan af leiknum voru Haukar síst lakari og náðu meðal annars fimm marka forskoti, 21:16, þegar níu mínútur voru liðnar af síðari hálfleik.
Mikið verður um að vera á Ásvöllum frá klukkan 16.30 í dag og fram yfir leikinn. Dagskrá hefur verið sett upp með von um að fólk fjölmenni og mæti snemma.
Vaskur hópur Eyjamanna lagði af stað frá Vestmannaeyjum klukkan sjö í morgun með Herjólfi til Þorlákshafnar og mætir án efa í þrumustuði á Ásvelli.
Olísdeild karla, úrslit, leikur tvö:
Ásvellir: Haukar – ÍBV (0:1), kl. 18 – sýndur á Stöð2 sport.
Þriðja viðureignin fer fram í íþróttamiðstöðinni í Vestmannaeyjum á föstudaginn og hefst klukkan 19.15.
