Þriðja umferð Olísdeildar kvenna hefst í kvöld með tveimur hörkuleikjum. Tíu dagar eru liðnir síðan síðast var leikið í deildinni. Landsliðið átti sviðið í síðustu viku. Þrjár umferðir verða leiknar á næstu tveimur vikum áður en hlé verður gert á nýjan leik vegna landsleikja í byrjun nóvember.
Stjarnan hefur farið vel af stað í Olísdeildinni og unnið bæði Fram og ÍBV. Stjörnuliðið tekur á móti KA/Þór í kvöld. Akureyrarliðið, sem vann Hauka í annarri umferð eftir tap fyrir ÍBV í fyrstu umferð, hefur gengið vel í TM-höllinni á síðustu árum og stundum tekist að gera Stjörnunni skráveifu í heimsóknum sínum.
Um það bil sem leiknum lýkur i TM-höllinni tekur við Reykjavíkurslagur, Vals og Fram, í Origohöllinni kl. 19.30. Valur hefur náð fljúgandi viðbragði á mótinu og unnið andstæðinga sína, Hauka og Selfoss, á sannfærandi hátt. Fram tapaði fyrir Stjörnunni í fyrstu umferð áður en liðið kjöldró HK í Úlfarsárdal í annarri umferð.
Örvhenta skyttan Madeleine Lindholm frá Finnlandi sem skrifaði undir samning við Fram á dögunum er orðin gjaldgeng með liðinu. Sömu sögu er að segja um Svartfellinginn, Tamara Jovicevic. Hún fékk leikheimild í morgunsárið.
Olísdeild kvenna, 3. umferð:
TM-höllin: Stjarnan – KA/Þór, kl. 18 – sýndur á Stjarnan handboltiTV.
Origohöllin: Valur – Fram, kl. 19.30 – sýndur á Stöð2sport.
Staðan í Olísdeild kvenna og næstu leikir.
Af óviðráðanlegum ástæðum getur handbolti.is ekki verið með textalýsingar frá leikjum kvöldsins.
