Dagur Gautason fór á kostum með ØIF Arendal í dag og skoraði átta mörk í níu skotum í fimm marka sigri liðsins á Kristiansand, 36:31, á heimavelli. Akureyringurinn sýndi gamalkunna takta á heimavelli og var markakhæstur. Ekkert markanna skoraði Dagur úr vítakasti.
Arendal færðist upp í 5. sæti með sigrinum í dag með sex stig eftir fimm leiki.
Áfram taplausir
Kolstad er áfram efst og taplaust í úrvalsdeildinni með 10 stig eftir fimm leiki. Kolstad vann Bækkelaget, 32:27, á heimavelli eftir að hafa verið sex mörkum yfir þegar fyrri hálfleikur var að baki, 17:11.
Benedikt Gunnar Óskarsson skoraði fimm mörk og gaf sex stoðsendingar fyrir Kolstad-liðið. Sigvaldi Björn Guðjónsson skoraði eitt mark og Arnór Snær Óskarsson ekkert. Sá síðarnefndi átti eina stoðsendingu.
Sigurjón Guðmundsson var um skeið í marki Kolstad í leiknum. Hann varði tvö skot af sjö, 29%.
Ísak stóð fyrir sínu
Ísak Steinsson, markvörður, og liðsfélagar í Drammen HK töpuðu sínum fyrsta leik í deildinni á keppnistímabilinu í dag. Fjellhammer-liðið kom í heimsókn og fór með bæði stigin heim, lokatölur 32:29.
Ísak stóð fyrir sínu í leiknum. Hann varði 13 skot, 30%. Drammen er í fjórða sæti með sjö stig.
