Japanska landsliðið undir stjórn Dags Sigurðssonar er komið með annan fótinn í undanúrslit í forkeppni Ólympíuleikanna í handknattleik í Asíu. Japanska landsliðið vann í dag sinn þriðja leik og er efst B-riðli keppninnar þegar liðið á einn leik eftir. Japanir lögðu Kúveitbúa, 32:30, eftir að hafa verið marki undir í hálfleik, 16:15.
Í A-riðli vann landsliðs Sádi Arabíu, undir stjórn Erlings Richarssonar, liðsmenn kínverska landsliðsins með 10 marka mun, 33:23. Meiri óvissa ríkir um hvort Sádi Arabar komist í undanúrslit. Sem stendur standa landslið Katar og Suður Kóreu betur að vígi í riðlinum.
Tvö efstu lið hvors riðils komast í undanúrslit. Sigurlið keppninnar, sem fram fer í Doha í Katar, tryggir sér farseðilinn á Ólympíuleikanna á næsta ári. Silfurliði kemst í forkeppni sem fram fer í Evrópu í mars.
Í B-riðli berjast Barein, sem Aron Kristjánsson þjálfar, og íranska landsliðið um að fylgja japanska landsliðinu í undanúrslit. Barein sat yfir í dag en mætir Kúveit á morgun. Japan leikur við Kasakstan og ætti að eiga sigur vísan.
Erlingur og Sádi Arabar leika við landslið Sameinuðu arabísku furstadæmanna á morgun.
