Dagur Gautason tók upp þráðinn á handknattleiksvellinum þar sem frá var horfið í vor þegar lið hans ØIF Arendal vann Haslum örugglega á útivelli í fyrstu umferð norsku úrvalsdeildarinnar, 33:26.
Dagur, sem var með aðsópsmestu leikmönnum norsku úrvalsdeildarinnar á síðasta tímabili, var næst markahæstur hjá ØIF Arendal í dag með sex mörk úr átta skotum. Ekkert markanna skoraði Akureyringurinn úr vítaköstum.
Elías tapaði á heimavelli
Fredrikstad Bkl., sem Elías Már Halldórsson þjálfar, tapaði í dag á heimavelli fyrir Follo í úrvalsdeild kvenna, 33:21, í fyrstu umferð.
Fyrsta tapið í fjögur ár
Óvænt úrslit voru í úrvalsdeild kvenna í gær þegar Noregsmeistarar síðustu sjö ára, Vipers Kristiansand, töpuðu fyrir Storhamar, 29:28, á heimavelli. Þetta var fyrsti tapleikur Vipers Kristiansand í leik í norsku úrvalsdeildinni í fjögur ár. Þá eins og nú voru það liðsmenn Storhamar sem lögðu stórliðið.
