Daníel Freyr Andrésson átti stórleik í marki FH þegar liðið vann öruggan sigur á ÍR, 33:25, í upphafsleik 11. umferðar Olísdeildar karla í handknattleik í Skógarseli í kvöld. Daníel Freyr varði 22 skot, annað hvert skot sem á mark FH kom meðan hann stóð á vaktinni. Auk þess skoraði Daníel Freyr eitt mark.
FH var fjórum mörkum yfir í hálfleik, 16:12, eftir að lengi vel hafði verið jafnræði með liðunum. ÍR-ingar hófu síðari hálfleik illa og skoruðu aðeins tvö mörk á fyrstu 10 mínútunum. FH lét ekki tækifærið sér úr greipum ganga og náði átta marka forskoti sem hélst meira og minna leikinn á enda.
Ágúst Birgisson fékk rautt spjald snemma í síðari hálfleik fyrir brot á Jökli Blöndal. Deila má um hvort Ágúst hafi átt spjaldið skilið því svo virtist sem samherji hans, Birkir Benediktsson, hafi átt stærri hlut í byltu Jökuls.
Baldur Fritz Bjarnason var allt í öllu hjá ÍR með 10 mörk og 10 sköpuð færi. Hann tapaði einnig boltanum í sjö skipti. Bernard Kristján Owusu Darkoh náði sér aldrei þessu vant ekki á strik.
FH færðist upp í fjórða sætið með sigrinum. Liðið hefur 13 stig eftir 11 leiki. ÍR er neðst sem fyrr með þrjú stig þegar helmingur leikja liðsins er að baki.
Mörk ÍR: Baldur Fritz Bjarnason 10/3, Róbert Snær Örvarsson 6, Nathan Doku Helgi Asare 3, Matthías Ingi Magnússon 1, Sveinn Brynjar Agnarsson 1, Jökull Blöndal Björnsson 1, Atli Kolbeinn Siggeirsson 1, Elvar Otri Hjálmarsson 1, Patrekur Smári Arnarsson 1.
Varin skot: Ólafur Rafn Gíslason 7, 22,6% – Alexander Ásgrímsson 2, 22,2%.
Mörk FH: Símon Michael Guðjónsson 6/3, Garðar Ingi Sindrason 6, Jón Bjarni Ólafsson 4, Birgir Már Birgisson 4, Jakob Martin Ásgeirsson 3, Kristófer Máni Jónasson 2, Birkir Benediktsson 2, Brynjar Narfi Arndal 2, Ágúst Birgisson 1, Bjarki Jóhannsson 1, Daníel Freyr Andrésson 1, Ómar Darri Sigurgeirsson 1.
Varin skot: Daníel Freyr Andrésson 22, 50% – Jón Þórarinn Þorsteinsson 0.
Tölfræði leiksins hjá HBStatz.
Staðan og næstu leikir í Olísdeildum.
