Þýska handknattleiksliðið Blomberg-Lippe fór afar vel af stað í Evrópudeildinni í handknattleik í gær en liðið er nú með í fyrsta sinn. Liðið lagði JDA Bourgogne Dijon Handball frá Frakklandi, 35:30, á heimavelli. Andrea Jacbosen lék ekki með Blomberg-Lippe vegna meiðsla. Díana Dögg Magnúsdóttir var á hinn bóginn með og stóð að vanda fyrir sínu.
Fjögur mörk
Díana Dögg skoraði fjögur mörk, átti tvær stoðsendingar var með sex sköpuð færi auk þess að vinna boltann tvisvar í vörninni.
Sigurður Hjörtur Þrastarson og Svavar Ólafur Pétursson dæmdu leikinn af röggsemi eins og þeirra er von og vísa.
Blomberg-Lippe var marki yfir í hálfleik, 18:17. Öflugur lokakafli liðsins tryggði því sigurinn með sjö af síðustu níu mörkum leiksins.
Næst til Ungverjalands
Sextán lið unnu sér sæti í riðlakeppni Evrópudeildarinnar fyrir áramótin. Þau eru nú í fjórum fjögurra liða riðlum. Auk Blomberg-Lippe og JDA Bourgogne Dijon Handball er pólska liðið KGHM MKS Zaglebie Lubin og Mosonmagyarovari KC frá Ungverjalandi í C-riðli. Lubin lagði Mosonmagyarovari, 31:29, á heimavelli í gær.
Blomberg-Lippe sækir Mosonmagyaróvár heim á sunnudaginn eftir viku.
Elías Már á leik í dag
Norska liðið Fredrikstad Bkl., sem Elías Már Halldórsson þjálfar, er í C-riðli Evrópudeildar. Fredrikstad Bkl fær þýska liðið Bensheim/Auerbach í heimsókn í dag.
