Forráðamönnum danska landsliðsins í handknattleik karla varð heldur betur á í messunni í morgun þegar þeir skráðu línumanninn Andreas Magaard til leiks á Evrópumótinu. Þegar til átti að taka kom í ljós að Magaard er meiddur og algjörlega ófær um að taka þátt í mótinu með danska landsliðinu.
Ákveðið var í morgun að skrá Magaard til leiks áður en slegið var á þráðinn til hans, til að flýta fyrir. Sá vinnusparnaður var til lítils því eftir að skráningin var send til mótstjórnar var haft samband við leikmanninn sem býr í Hamborg. Magaard sagði þá farir sínar ekki sléttar vegna meiðsla. Magaard hefur aldrei leikið A-landsleik.
Aðeins má kalla tvo leikmenn inn í hóp í milliriðlakeppninni. Önnur skipting Dana er þar með farin fyrir lítið.
Magaard átti að koma í stað Lukas Jørgensen sem sleit krossband í leik í riðlakeppninni. Frederik Ladefoged, annar línumaður sem í 35 manna hópi Dana er einnig óleikfær vegna meiðsla. Fjórði línumaðurinn, Emil Bergholt, getur ekki stokkið inn í hópinn vegna þess að sambýliskona hans á von á sér á hverri stundu. Nikolaj Jacobsen landsliðsþjálfari er þar með kominn í töluverð vandræði með að hafa aðeins einn línumann eftir í sínum hóp.
