„Við vorum eins og beljur á vorin þegar við hlupum inn á völlinn, þá var þetta allt saman æðislegt þótt endirinn hafi ekki verið alveg eins og Titanic. En við gerðum okkar allra besta,“ segir Hafdís Renötudóttir landsliðsmarkvörður og grallari sem svaraði skemmtilega fyrir sig þegar handbolti.is hitti hana að máli á hóteli landsliðsins, daginn eftir tapleik íslenska landsliðsins fyrir Þýskalandi, 32:25, á heimsmeistaramótinu í handknattleik.
Hafdís sló um sig í viðtalinu með ýmsum frösum sem hressti upp á íhaldssemina hjá handbolta.is svo úr varð hið skondnasta viðtal sem í gamni var gert enda mörg svörin óvenjuleg og jafnvel aðeins út í hött. Allt er þetta hluti af leik sem er í gangi meðal leikmanna íslenska landsliðsins. Má svo sannarlega hafa gaman af enda tilgangurinn.
Spurð út í samvinnu hennar og varnarinnar í leiknum í gær svaraði Hafdís vitanlega í léttum dúr. „Það gekk bara ágætlega. Fyrir leikinn vorum við að peppa okkur saman með því að hlusta á lagið Ég set búnt á skenkinn. Svo hófst leikurinn og það voru mörg hraðaupphlaup og víti fyrir bílakjallarann. Við gerðum okkar besta og vonandi gengur betur gegn Serbum,“ sagði Hafdís.
Annars er best að hafa sem fæst orð og leyfa áhorfendum að hlusta á stórskemmtileg svör Hafdísar í myndskeiðinu hér fyrir ofan um leið og handbolti.is tekur undir með Herra Hnetusmjör: „Elli Egils á vegginn (Wouh)“.
HM kvenna ”25 – dagskrá, riðlakeppni, úrslit
A-landslið kvenna – fréttasíða
Landslið Íslands á HM kvenna 2025
