Einar Baldvin Baldvinsson markvörður Aftureldingar er óðum að sækja í sig veðrið á ný eftir að hafa átt í hnémeiðslum sem hann varð fyrir í viðureign Aftureldingar og KA 18. september. Liðband í innanverðu hægra hné trosnaði.
Einar Baldvin sagði við handbolta.is á laugardaginn að hann reiknaði ekki með öðru en að hefja æfingar með Aftureldingarliðinu af fullum þunga í þessari viku. Æfingar vikunnar verði síðan að leiða í ljós hvort hann verður með Aftureldingarliðinu á föstudaginn þegar Stjörnumenn verða sóttir heim í 8. umferð Olísdeildarinnar.
Ungt markvarðapar
Unglingalandsliðsmarkvörðurinn efnilegi, Sigurjón Bragi Atlason, hefur staðið sig afar vel með Aftureldingu í fjarveru Einars Baldvins. Sigurjóni Braga til halds og trausts í leiknum við ÍBV á laugardaginn var Sölvi Þór Daníelsson sem tók þátt í sínum fyrsta leik í Olísdeildinni. Saman mynduðu Sigurjón Bragi og Sölvi Þór eflaust eitt yngsta markvarðapar í sögu Olísdeildarinnar en samanlagður aldur þeirra er 36 ár.
