Ljóst er að alltént eitt lið úr Olísdeild karla á eftir að heltast úr lestinni að lokinni fyrstu umferð bikarkeppni HSÍ en dregið var til hennar í morgun. FH og Grótta mætast í Kaplakrika og víst að aðeins annað liðið kemst í 16-liða úrslit.
Til viðbótar sækir Afturelding lið Þórs Akureyri heim í fyrstu umferð og Fjölnismenn fá nýja nágranna sína úr Grafarholtinu, Framara, í heimsókn í Dalhús.
Fleiri verða leikirnir ekki í 1. umferð bikarkeppninnar í karlaflokki. Áformað er að viðureignirnar fari fram 27. og 28. október. Reikna má með að leikdagar verði festir í dag.
Eftirtalin lið sitja hjá í 1. umferð:
Haukar, ÍBV, KA, Valur, HK, Hörður, ÍBV 2, ÍR, Kórdrengir, Selfoss, Stjarnan, Víðir, Víkingur.
Ekki var dregið í 1. umferð í bikarkeppninni í kvennaflokki vegna þess að liðin sem eru skráð til leiks taka sæti í 16-liða úrslitum.
Dregið verður í 16-liða úrslit karla og kvenna í byrjun nóvember.
