Handknattleikskonurnar Díana Dögg Magnúsdóttir og Sandra Erlingsdóttir máttu báðar bíta í það súra epli að tapa leikjum með liðum sínum í þýsku 1. deildinni í handknattleik í kvöld. Díana Dögg og samherjar í Sachsen Zwickau töpuðu á útivelli fyrir Blomberg-Lippe, 33:26, en Sandra og félagar hennar biðu lægri hlut fyrir Thüringen HC 34:29, einnig á útivelli.
Díana Dögg skoraði fjögur mörk, átti níu stoðsendingar, þrjú sköpuð færi, náði einu frákasti og var með eitt stopp í vörninni í heimsókninni til Blomberg. „Þetta var ekki okkar dagur,“ sagði Díana Dögg við handbolta.is í kvöld.
Sandra skoraði ekki mark fyrir Metzingen í tapinu í heimsókn til Thüringen HC. Lið Söndru var fimm mörkum undir eftir fyrri hálfleik, 16:11.
TuS Metzingen er í fimmta sæti deildarinnar með 18 stig eftir 16 leiki og er 14 stig á eftir Bietigheim sem er taplaust í efsta sæti eins og fyrr. Áðurgreint lið Thüringen HC er í öðru sæti með 29 stig.
Sachsen Zwickau og Díana Dögg eru í 11. sæti af 14 liðum með 10 stig.
