U17 ára landslið kvenna tapaði fyrri vináttuleik sínum við Tékka í Prag í kvöld, 29:18, eftir að hafa verið níu mörkum undir að loknum fyrri hálfleik, 18:9.
Það reyndist erfitt fyrir íslensku stúlkurnar að lenda svo mikið undir strax í fyrri hálfleik. Þær gerðu sitt besta í síðari hálfleik til þess að vinna upp muninn en tókst ekki. Íslenska liðið mætir tékkneska liðinu öðru sinni í Prag síðdegis á morgun. Þá verða leikmenn íslenska liðsins reynslunni ríkari en flestar þeirra eru að leika sína fyrstu landsleiki.
U17 ára landsliðið tekur þátt í EM í ágúst sem haldið verður í Svartfjallalandi. Leikirnir í Prag eru liður í undirbúningi fyrir mótið. Dregið var í riðla í vikunni og hittist þannig á að lið Íslands og Tékklands verða saman í riðli.
Mörk Íslands: Guðrún Hekla Traustadóttir 5, Lydía Gunnþórsdóttir 5, Dagmar Guðrún Pálsdóttir 3, Ester Amira Ægisdóttir 2, Ásrún Inga Arnarsdóttir 1, Guðmunda Auður Guðjónsdóttir 1, Bergrós Ásta Guðmundsdóttir 1.
Varin skot: Sif Hallgrímsdóttir 9, Ingunn María Brynjarsdóttir 7.
