Elliði Snær og Guðjón Valur í efsta sætið á ný

Gummersbach, sem Guðjón Valur Sigurðsson þjálfar, endurheimti efsta sæti þýsku 2. deildarinnar í handknattleik karla í kvöld með öruggum sigri á Grosswallstadt í rimmu þessara fornfrægu félaga á heimavelli Gummersbach í kvöld, 35:27.

Elliði Snær Viðarsson var að vanda í stóru hlutverki hjá Gummersbach, jafnt í vörn sem sókn. Hann skoraði fjögur mörk í fimm skotum af línunni og var aðsópsmikill í vörninni.

Hákon Daði Styrmisson var ekki með vegna meiðsla. Hann sleit krossband skömmu fyrir áramót og verður af þeim sökum ekki meira með á keppnistímabilinu.

Ungverjinn Martin Nagy, sem varð Íslandsmeistari með Val á síðustu leiktíð, stóð í marki Gummersbach í liðlega tíu mínútur að þessu sinni og varði ekki skot.

Gummersbach var fjórum mörkum yfir að loknum fyrri hálfleik og gaf ekki þumlung eftir í síðari hálfleik. Liðið hefur þar með 36 stig í efsta sæti þegar 23 leikir eru að baki. Nordhorn hafði hreiðrað um sig í efsta sætinu eftir leiki helgarinnar með 36 stig en hefur leikið einum leik fleira. Framundan er áframhaldandi slagur liðanna um efsta sætið. Önnur lið er nokkuð á eftir og þarf talsvert að koma til svo þau blandi sér í slaginn um tvö efstu sætin sem veita flutningsrétt upp í 1. deild.

Staðan: