Elliði Snær verður úr leik næstu vikur

Elliði Snær Viðarsson landsliðsmaður í handknattleik og leikmaður þýska liðsins Gummersbach verður frá keppni í einhverjar vikur. Elliði Snær tognaði á liðbandi á innanverðu á vinstra hné í síðari hálfleik í viðureign Gummersbach og MT Melsungen í fyrri viðureign liðanna í útsláttarkeppni Evrópudeildarinnar í gærkvöld.

Einn leikmanna Melsungen mun hafa skrikað fótur í hita leiksins og fallið á Elliða Snær með þeim afleiðingum að högg kom á vinstra hné.

Gummersbach tilkynnti í dag, eftir læknisskoðun, að Elliði Snær verði frá keppni næstu vikur.

Elliði Snær var frá keppni í nóvember og framundir jól vegna annarra meiðsla í hné.