„Elvar getur leyst nokkur hlutverk hjá okkur ef þörf verður á,“ segir Snorri Steinn Guðjónsson landsliðsþjálfari í handknattleik spurður af hverju hann kaus að velja Elvar Ásgeirsson handknattleikmann hjá Ribe-Esbjerg í landsliðshópinn þegar víst var að Elvar Örn Jónsson tæki ekki þátt í fleiri leikjum á EM vegna meiðsla.
Sá fjölhæfasti
„Úr þeim hópi leikmanna sem ég hafði úr að velja þá er Elvar sá fjölhæfasti að mínu mati. Hann getur farið í ýmis hlutverk, jafnt í vörn sem sókn. Þess utan býr Elvar yfir reynslu frá þátttöku á stórmótum. Að vandlega athuguðu máli fannst okkur Elvar „tikka“ í flest boxin.
Ofan á annað þá vitum við ekki hvernig Þorsteinn Leó kemur út úr alvöru átökum eftir 10 vikna fjarveru frá handboltavellinum. Þess vegna er rétt að hafa mann á svæðinu eins og Elvar sem er kominn inn í mál hjá okkur ef við þurfum á að halda,“ sagði Snorri Steinn Guðjónsson landsliðsþjálfari í dag.
Elvar kom til Malmö í gærkvöld frá Esbjerg þar sem hann býr og leikur með danska úrvalsdeildarliðinu Ribe-Esbjerg.
