Íslenska landsliðið í handknattleik kvenna, skipað leikmönnum 19 ára og yngri, steinlá fyrir portúgalska landsliðinu í síðasta leik sínum í B-riðli Evrópumótsins í Pitesi í Rúmeníu í dag. Niðurstaðan var 17 marka tap, 44:27, eftir að portúgalska liðið var 12 mörk yfir eftir fyrri hálfleik, 22:10.
Þar með er kristaltært að íslenska liðið leikur um sæti níu til sextán á mótinu og hefur keppni án stiga. Fyrsti leikurinn verður á þriðjudaginn gegn Hollandi. Sigurinn færði portúgalska liðinu sæti í átta liða úrslitum.
Úrslit leiksins réðust strax í fyrri hálfleik þegar portúgalska liðið keyrði yfir það íslenska með ákveðnum varnarleik og vel út færðum sóknarleik. Auk þess varði markvörður portúgalska liðsins allt hvað af tók. Segja má að hernaðaráætlanir íslenska liðsins hafa hrunið snemma leiks. Hvað sem reynt var, gekk ekkert upp.
Til að bæta gráu ofan á svart þá meiddist Tinna Sigurrós Traustadóttir í fyrri hálfleik og kom ekkert meira við sögu. Eftir því sem handbolti.is kemst næst var hún flutt á spítala til skoðunar en hún fékk högg á handlegg eða fingur.
Mörk Íslands: Elín Klara Þorkelsdóttir 6, Lilja Ágústsdóttir 5, Embla Steindórsdóttir 3, Inga Dís Jóhannsdóttir 3, Hildur Lilja Jónsdóttir 2, Katrín Anna Ásmundsdóttir 2, Sonja Lind Sigsteinsdótir 2, Brynja Katrín Benediktsdóttir 1.
Varin skot: Elísa Helga Sigurðardóttir 4, 14,8% – Ethel Gyða Bjarnasen 2, 8,7%.
EMU19: Dagskrá, úrslit og staðan
Handbolti.is fylgdist með leiknum í textalýsingu hér fyrir neðan.
