Engar útsendingar frá landsleikjunum við Grikki

Vináttulandsleikir Grikklands og Íslands í handknattleik karla sem fram fara í Aþenu á föstudag og á laugardag verða hvorki sendir út í sjónvarpi né streymt á netinu.

Kjartan Vídó Ólafsson markaðsstjóri HSÍ staðfesti þetta við handbolta.is í morgun eftir að HSÍ fékk loksins svar frá gríska handknattleikssambandinu varðandi útsendingarnar.

Kjartan Vídó sagði metnaðarleysi Grikkja fyrir að taka upp og senda út leikina vera mikil vonbrigði enda ríki ævinlega gríðarleg eftirvænting hér á landi fyrir leikjum íslensku handknattleikslandsliðanna, hvort sem þau leika heima eða að heiman.

Fyrri leikur Íslands og Grikklands hefst á föstudag klukkan 14 og sá síðari á laugardag klukkan 17.15. Um íslenskan tíma er að ræða.