Líklegt má telja að núverandi aðgerðir í sóttvörnum á höfuðborgarsvæðinu verði framlengdar eftir 19. október þegar núverandi reglur renna út. Þetta kom fram í samtali við Þórólf Guðnason, sóttvarnalækni, á vísi.is í dag.
Af þessu leiðir að vikur geta liðið enn þar til æfingar hjá félögunum á höfuðborgarsvæðinu hefjist á ný og enn lengra þar til hægt verður aftur að flauta til leiks á Íslandsmótinu í handknattleik.
Ekki hafa verið æfingar hjá handknattleiksfélögum á höfuðborgarsvæðinu síðan núverandi sóttvarnareglur tóku gildi í byrjun síðustu viku. Einnig hefur keppni á Íslandsmótinu legið niðri frá sama tíma. Reglur utan höfuðborgarinnar eru ekki eins strangar og þess vegna geta félögin á Akureyri, Ísafirði, á Selfossi og í Vestmannaeyjum æft eins og áður.
Sóttvarnalæknir skilar inn tillögum til heilbrigðisráðherra á fimmtudaginn sem taka við þegar núverandi reglur falla úr gildi á mándaginn. Hann segir að fara verði varlega í að létta aðgerðum á höfuðborgarsvæðinu. Þar greinast daglega margir tugir tilfella kórónuveirusmita og engin merki eru enn um að faraldurinn sé í rénun. Þar af leiðandi reiknar Þórólfur með að íbúar höfuðborgarsvæðisins verði að búa sig undir að núverandi reglur eða a.mk. hertar reglur verði áfram við lýði.
