Jens Steffensen framkvæmdastjóri danska handknattleiksliðsins Viborg viðurkennir að félagið sé í afar snúinni stöðu vegna hyldýpis gjáar sem hefur myndast milli leikmanna liðsins annars vegar og Christian Pedersen, helstu kempu liðsins, hinsvegar. Pedersen var send í 14 daga frí frá æfingum eftir samherjar hennar þverneituðu að æfa með henni, eins og handbolti.is sagði frá á dögunum.
Steffenen segir í samtali við TV2 að ekki hafi tekist að bera klæði á vopnin. Hann viti hreinlega ekki í hvorn fótinn hann eigi að stíga vegna málsins. Leikmenn sitja við sinn keip. Vika er liðin síðan Pedersen var send í leyfi. Lausn er ekki sögð í sjónmáli.
Það sem flækir málið er að ekki er aðeins um að ræða markahæsta leikmann Viborg á síðustu heldur skrifaði Pedersen undir nýjan samning við félagið í maí. Sú staðreynd auðveldar félaginu ekki að losa sig við hana.
„Það er víst að við hefðum gert eitt og annað öðruvísi hefðum við í vor vitað það sem við vitum í dag,“ segir Steffensen framkvæmdastjóri og er svo sannarlega ekki öfundsverður að standa á milli tveggja elda.
Hvorki Pedersen né Maria Fisker fyrirliði Viborg hafa viljað tjá sig um málið.
Sofie Bæk handboltasérfræðingur TV2 segir Viborg ekki eiga nema einn kost í málinu. Hann sé að losa sig við Pedersen. Traust muni aldrei ríkja á milli Pedersen og annarra í liðinu eftir það sem á undan er gengið.
Send í ótímabundið leyfi vegna leiðinda
