„Við erum stoltar og ánægðar með okkur. Þetta er ótrúlega gaman,“ sagði Sunna Jónsdóttir leikmaður ÍBV í samtali við handbolta.is eftir að ÍBV-liðið komst áfram í átta liða úrslit Evrópubikarkeppninnar í handknattleik kvenna eftir tvo afar örugga sigra á tékkneska liðinu Sokol Pisek í Vestmannaeyjum í dag og í gær, samanlagt 60:49.
„Eins og fyrir aðra leiki í keppninni þá vorum við ekki alveg vissar á styrkleikanum á andstæðingnum, renndum örlítið blint í sjóinn. Þegar á hólminn var komið var ljóst að við vorum með betra lið. Á því lék enginn vafi,“ sagði Sunna og bætti við lað ögð hafi verið rík áhersla á að leika góða vörn, vera með öfluga markvörslu og hlaupa miskunnarlaust hraðaupphlaup. Það hafi í stórum dráttum gengið vel og lagt gunn að tveimur góðum sigrum í gær og í dag.
„Uppleggið fyrir leikina var gott, það gekk alveg upp og þess vegna göngum við sáttar frá borði eftir þessa helgi,“ sagði Sunna sem var í pizzuveislu með ÍBV-liðinu á 900 Grillhúsi þegar handbolti.is sló á þráðinn til hennar.
Veitir byr undir báða vængi
Sunna segir að leikirnir veiti ÍBV-liðinu byr undir báða vængi fyrir framhaldið. Framundan er þétt leikjadagskrá í Olísdeildinni þar sem liðið hefur aðeins dregist aftur úr auk þess sem framundan séu tveir leikir í átta liða úrslitum Evrópubikarsins eftir miðjan febrúar.
„Ég hef fulla trú á því að við eigum eftir að eflast á næstu vikum. Það er góður andi í hópnum og við hlökkum til framhaldsins,“ sagði Sunna ennfremur.
Gaman að vera eitt af átta
Dregið verði í átta liða úrslit Evrópubikarkeppninnar mánudaginn 17. janúar en leikirnir fara fram eftir miðjan febrúar eins og áður segir. „Við höfum það markmið í þessari keppni að taka einn leik fyrir í einu og sjá til hvaða árangri það skilar okkur. En óneitanlega er gaman til þess að vita að vera eitt þeirra átta liða sem er eftir í keppninni. Það frábær staðreynd og glæsilegur árangur hjá okkur. “
Sunna segir ekkert hik vera á leikmönnum að halda áfram að fjárafla fyrir næstu umferð keppninnar. „Við erum fyrst fremst þakklátar öllum þeim fyrirtækjum sem styðja við bakið á okkur og einnig stjórnendum ÍBV sem hafa veitt okkur þetta tækifæri að taka þátt, nokkuð sem er ekkert endilega sjálfgefið eins og ástandið er,“ sagði Sunna Jónsdóttir leikmaður handknattleiksliðs ÍBV og landsliðskona í samtali við handbolta.is í dag.
Þar sem enn er talsvert eftir af leikjum í 16-liða úrslitum er enn of snemmt að bollaleggja um hvaða liðum ÍBV getur hugsanlega dregist gegn.
