- Auglýsing -

Eyjakonur fyrstar til að sigra Val

Hildigunnur Einarsdóttir og félagar í Val leika við ÍBV í dag. Mynd/Egill Bjarni Friðjónsson

Valur og ÍBV mættust í Olísdeild kvenna í handknattleik í Origohöllinni klukkan 13.30 í upphafsleik 11. umferðar deildarinnar. ÍBV vann leikinn með þriggja marka mun, 32-29, og varð þar með fyrsta liðið til þess að leggja Valsliðið í Olísdeildinni á keppnistímabilinu.

Valskonur byrjaði leikinn betur og sóknarvandræði voru hjá liði ÍBV. Eftir fimm mínútna leik var staðan 4-1 fyrir Val. Þá tók Sigurður Bragason, þjálfari ÍBV, leikhlé. Eftir það komust Eyjakonur betur í takt við leikinn en Valsliðið náði að halda um tveggja marka forystu fram á 10. mínútu fyrri hálfleiks. Sunna Jónsdóttir jafnaði í 7-7 fyrir ÍBV og var mikið jafnræði með liðunum eftir það fram til loka fyrri hálfleiks. ÍBV komst fyrst yfir í stöðunni 10-11 með marki frá Bríeti Ómarsdóttur á 19. mínútu. Síðustu tíu mínútur fyrri hálfleiks skiptust liðin á að vera með forystuna og þegar flautað var til hálfleiks var staðan jöfn, 15-15.

Staðan í Olísdeild kvenna.

Stórleikur Hrafnhildar Hönnu

Lið ÍBV byrjaði seinni hálfleik betur og komst í 15-17 með marki Hrafnhildar Hönnu Þrastardóttur, sem fór fyrir sóknarleik ÍBV, sérstaklega í síðari hálfleik. Alls skoraði Hrafnhildur fjórtán mörk þegar uppi var staðið, ellefu þeirra í seinni hálfleik. ÍBV bætti í þegar leið á seinni hálfleikinn og í markinu varði Marta Wawrzykowska fjögur skot á fyrstu tíu mínútum seinni hálfleiks. Þá var talsvert um tapaða bolta í sóknarleik Vals.

Hrafnhildur Hanna kom ÍBV þremur mörkum yfir, 17-20, eftir 35 mínútna leik en Valsliðið svaraði með tveimur mörkum í röð, 19-20. Í stöðunni 20-21 fyrir ÍBV skildu leiðir á ný og komst ÍBV í fimm marka forskot, 20-25 þegar seinni hálfleikur var tæplega hálfnaður. Áfram var það Hrafnhildur Hanna Þrastardóttir sem raðaði inn mörkum fyrir ÍBV. Mestur varð munurinn í sjö mörk, 21-28 fyrir ÍBV, þegar innan við 15 mínútur voru eftir og allt stefndi í nokkuð öruggan sigur.

Spennandi lokamínútur

Valskonur voru þó ekki á þeim stuttbuxunum að leggja árar í bát, heldur skoruðu þær fjögur mörk í röð og staðan 25-28 þegar níu mínútur voru eftir. Enn náðu heimakonur að saxa niður forskotið. Mikil spenna ríkti þegar fimm mínútur voru eftir og einungis tveggja marka munur, 27-29. Munaði um að Hrafnhildur Anna Þorleifsdóttir kom inn í mark Vals um miðjan seinni hálfleiks og átti góðar markvörslur á mikilvægum tímapunkti.

ÍBV náði þó að spyrna frá sér á ný á síðustu mínútunum, komust í 27-31 og náði að lokum að knýja fram gríðarlega öflugan sigur, 29-32. Fyrir leikinn var Valsliðið ósigrað í Olís-deild kvenna og bundu því Eyjakonur enda á taplaust gengi Vals þetta tímabilið.

Í marki Vals varði Sara Sif Helgadóttir 5 skot. Hrafnhildur Anna Þorleifsdóttir varði 4 skot í síðari hálfleik. Markahæst var Mariam Eradze með 8 mörk, því næst komu þær Þórey Anna Ásgeirsdóttir með 7 mörk og Thea Imani Sturludóttir með 6 mörk. Lilja Ágústsdóttir skoraði 3 mörk. Þær Auður Ester Gestsdóttir og Elín Rósa Magnúsdóttir skoruðu báðar 2 mörk. Hildur Björnsdóttir skoraði 1 mark.

Skarð var fyrir skildi hjá Val að Morgan Marie Þorkelsdóttir, Sara Dögg Hjaltadóttir og Sigríður Hauksdóttir voru fjarverandi að þessu sinni.

Hjá ÍBV varði Marta Wawrzykowska sjö skot. Markahæst var, eins og áður sagði, Hrafnhildur Hanna Þrastardóttir með 14 mörk. Þar næst var Birna Berg Haraldsdóttir með 6 mörk. Elísa Elíasdóttir skoraði fimm mörk, sem og Sunna Jónsdóttir. Sara Dröfn Ríkharðsdóttir og Bríet Ómarsdóttir skoruðu 1 mark hvor.

Staðan í Olísdeild kvenna.

Handbolti.is fylgdist með leiknum í textalýsingu hér fyrir neðan.

- Auglýsing -
- Auglýsing -

Nýjustu fréttir

- Auglýsing -