KA hefur samið við færeyska línumanninn Pætur Mikkjalsson um að leika með liðinu á næstu tvö árin frá og með næsta keppnistímabili. Frá þessu er greint á heimasíðu félagsins.
Mikkjalsson sem er 24 ára gamall landsliðsmaður Færeyinga kemur til KA frá SUS Nyborg í Danmörku hvar hann lék í vetur. Þar áður var Mikkjalsson með H71 í Þórshöfn, m.a. tímabilið 2019/2020 þegar Einar Jónsson verðandi þjálfari Fram var aðalþjálfari færeyska liðsins.
Mikkjalsson ólst upp hjá H71 en gekk til liðs við Neistan og var í sigurliði félagsins í færeysku bikarkeppninni vorið 2019.
Mikkjalsson skoraði 62 mörk í 26 leikjum með SUS Nyborg í dönsku B-deildinni í vetur en liðið rak lestina og féll í C-deild. Mikkjalsson er 190 sentímetrar á hæð og hefur átt sæti í færeyska landsliðinu um nokkurt skeið.
