Teitur Örn Einarsson dró ekki af sér er hann skoraði eitt af fimm mörkum sínum í kvöld fyrir IFK Kristianstad þegar liðið vann 19 marka sigur á Hallby á heimavelli í sænsku úrvalsdeildinni í handknattleik, 38:19. Myndskeið af markinu er hér fyrir neðan. Ljóst er að hvorki markvörður Hallby né varnarmenn sáu boltann fyrr enn hann hafði þanið út netmöskvana.
Kristianstad hafði yfirburði í leiknum frá upphafi til enda og var með átta marka forskot að loknum fyrri hálfleik, 18:10.
Sem fyrr segir skoraði Teitur Örn fimm mörk. Hann átti sjö markskot og fimm stoðsendingar. Ólafur Andrés Guðmundsson, fyrirliði, skoraði þrjú mörk. Gustaf Banke átti stórbrotinn leik í marki Kristianstad, fór hreinlega hamförum. Hann varði 22 skot og var með 56,4% hlutfallsmarkvörslu sem er hreint einstakur árangur.
Kristianstad er í sjötta sæti deildarinnar með 19 stig eftir 14 leiki og er fjórum stigum á eftir Malmö sem hefur leikið 15 leiki og situr á toppnum.
