FH varð í kvöld Íslandsmeistari í handknattleik karla í 17. sinn eftir að hafa lagt Aftureldingu, 31:27, í fjórða úrslitaleik liðanna um Íslandsmeistaratitilinn að Varmá í kvöld. Sigur FH í þessum leik var sannarlega sanngjarn. Þeir voru með yfirhöndina allan leikinn og gerðu út um vonir Aftureldingarmanna á síðustu 20 mínútunum.
FH var tveimur mörkum yfir í hálfleik, 16:14, og skoraði tvö fyrstu mörkin í síðari hálfleik. Mosfellingum tókst að minnka muninn niður í eitt mark, 19:20. Nær komust þeir ekki.
Sóknarleikurinn gekk ekki sem skildi hjá Aftureldingarliðinu. Daníel Freyr Andrésson gerði markvörðum Aftureldingar gramt í geði auk þess sem mistökin voru mörg. Nær engum tókst að hitt á sinn dag. Þá var markvarslan ekki viðunandi hjá Aftureldingarliðinu.
Aron Pálmarsson kom heim til þess að vinna Íslandsbikarinn með FH. Hann gerði það svo sannarlega með frábærri frammistöðu, bæði í úrslitakeppninni og í deildarkeppninni áður. Kom val á honum sem mikilvægasta leikmanni úrslitakeppninnar þar af leiðandi fáum í opna skjöldu.
Jóhannes Berg Andrason átti frábært tímabil með FH og sprakk hreinlega út í úrslitakeppninni. Ásbjörn Friðriksson sýndi allar sparihliðarnar þegar mest á reyndi og var leiðtogi liðsins ásamt Aroni.
Afturelding lék sinn slakasta leik í kvöld af þeim fjórum sem eru að baki í einvíginu.
Mörk Aftureldingar: Jakob Aronsson 7, Birgir Steinn Jónsson 6/2, Þorsteinn Leó Gunnarsson 5, Blær Hinriksson 3, Árni Bragi Eyjólfsson 3, Ihor Kopyshynsky 2, Andri Þór Helgason 1.
Varin skot: Brynjar Vignir Sigurjónsson 5, 26,3% – Jovan Kukobat 2, 11,8%.
Mörk FH: Ásbjörn Friðriksson 7, Jóhannes Berg Andrason 7, Birgir Már Birgisson 4, Aron Pálmarsson 4, Jón Bjarni Ólafsson 3, Leonharð Þorgeir Harðarson 2, Einar Bragi Aðalsteinsson 2, Símon Michael Guðjónsson 2.
Varin skot: Daníel Freyr Andrésson 13, 33,3%.
Handbolti.is var að Varmá og fylgdist með leiknum í textalýsingu hér fyrir neðan.
