Íslenska landsliðið vann það færeyska með fimm marka mun í fyrri vináttuleik þjóðanna í handknattleik kvenna í Skála á Austurey í kvöld, 28:23, eftir að hafa verið fjórum mörkum yfir í hálfleik, 15:11. Liðin mætast öðru sinni í Klaksvík klukkan 17 á morgun en leikirnir eru liður í undirbúningi beggja fyrir forkeppni HM sem fram fer í kringum næstu helgi.
Báðir hálfleikir voru kaflaskiptir að hálfu íslenska liðsins. Fjögurra marka forskot sem var í hálfleik hvarf eins og dögg fyrir sólu snemma í síðari hálfleik eftir að Færeyingar skoruðu fimm mörk gegn einu í framhaldi af slæmum íslenskum kafla með talsverðum mistökum í sókninni.
Þegar á leið sótti íslenska liðið í sig veðrið. Það varðist betur og fékk í kjölfarið mörk eftir hraðaupphlaup. Einnig lifnaði yfir samleiknum og færi opnuðust m.a. á línu, færi sem skiluðu ýmist mörkum eða vítaköstum. Á skömmum tíma náði íslenska liðið sjö marka forskoti og sigurinn var í höfn.
Elín Klara Þorkelsdóttir og Lilja Ágústsdóttir fengu tækifæri undir lokin í sínum fyrstu landsleikjum. Elín Klara skoraði 28. markið og sitt fyrsta A-landsliðsmark.
Mörk Íslands: Mörk Íslands: Sandra Erlingsdóttir 7, Perla Ruth Albertsdóttir 5, Andrea Jacobsen 4, Steinunn Björnsdóttir 4, Thea Imani Sturludóttir 2, Þórey Rósa Stefánsdóttir 2, Díana Dögg Magnúsdóttir 1, Elín Klara Þorkelsdóttir 1, Katrín Tinna Jensdóttir 1, Rut Arnfjörð Jónsdóttir 1.
Varin skot: Hafdís Renötudóttir 16/2.
Handbolti.is fylgdist með leiknum í textalýsingu hér fyrir neðan.
