Heims- og Evrópumeistarar Noregs tryggðu sér í gærkvöld sæti í átta liða úrslitum heimsmeistaramótsins í handknattleik kvenna með öruggum sigri á landsliði Slóveníu, 34:21, í Þrándheimi. Annað kvöld mætast Noregur og Frakkland í lokaumferð í milliriðli tvö í úrslitaleik um efsta sætið.
Slóvena héldu í við Norðmenn fyrsta stundarfjórðunginn í gær. Eftir það skildu leið og norska liðið, undir stjórn Þóris Hergeirssonar, lék við hvern sinn fingur.
Mikil breidd
„Ég held að við höfum ekki lengi verið með eins góða breidd í leikmannahópnum. Hvort það skila okkur alla leið kemur síðar í ljós,“ sagði miðjukonan Stine Oftedal í samtali við TV2 í Noregi eftir sigurinn í gær.
Oftedal skoraði fimm mörk í leiknum en alls skoruðu 12 leikmenn liðsins a.m.k. eitt mark að þessu sinni svo enn einu sinni náði Þórir að dreifa álaginu vel á milli leikmanna. Camilla Herrem var markahæst og það ekki í fyrsta sinn á mótinu. Hún skoraði sex mörk.
Öflugir markverðir
Silje Solberg og Katrine Lunde skiptu leiknum á milli sín í marki Noregs og voru með 39% hlutfallsmarkvörslu.
Alja Varagić var atkvæðamest í slóvenska liðinu með fimm mörk. Stórskyttan Ana Gros komst lítt áleiðis og skoraði aðeins fjögur mörk.
Hollendingar flugu áfram
Hollendingar eru efstir í milliriðli fjögur og eiga sæti í átta liða úrslitum víst. Hollenska landsliðið vann úkraínska landsliðið með miklum yfirburðum í síðasta leik gærkvöldsins í Frederikshavn, 40:21. Tékkland, Spánn og Brasilía eiga möguleika á að fylgja Hollendingum eftir í átta liða úrslit í milliriðli fjögur.
Lois Abbingh skoraði átta mörk fyrir hollenska landsliðið og var markahæst. Kelly Vollebregt var næst með sex mörk.
