Norska landsliðið heldur áfram að hafa yfirburði í leikjum sínum á heimsmeistaramóti kvenna í handknattleik í Hollandi og Þýskalandi. Norska liðið rúllaði yfir brasilíska landsliðið í kvöld, 33:14, í síðasta leik sínum í milliriðli þrjú. Norska landsliðið hefur unnið allar sex viðureignir sínar á mótinu til þessa með miklum yfirburðum og skoraði 97 mörkum meira en andstæðingarnir, sem að jafnaði hafa unnið leiki sína með 16 marka mun.
Brasilíska landsliðið, sem var öruggt um sæti í átta liða úrslitum fyrir leikinn í kvöld, var aldrei með á nótunum í viðureigninni við norska landsliðið í Westfalenhalle í Dortmund. Eftir 20 mínútna leik var norska landsliðið með níu marka forskot, 12:3. Staðan í hálfleik, 18:7.
Vilde Ingstad var markahæst með sex mörk og Emile Hovden var næst með fimm mörk.
Naumur sigur Dana
Danir björguðu sér um sigur á Ungverjum á elleftu stundu í viðureign í Rotterdam, 28:27. Ungverjar voru lengst af með undirtökin í leiknum.
Ungverska liðið var með tveggja marka forskot í hálfleik, 15:13, og náði með fjögurra marka forskoti, 23:19, rétt fyrir miðjan síðari hálfleik. Dönum tókst að snúa við taflinu á síðustu mínútum. Þeir skoruðu fjögur af síðustu fimm mörkum viðureigninnar.
Skýrist annað kvöld
Danir mæta annaðhvort Frökkum eða Hollendingum í átta liða úrslitum. Frakkland og Holland mætast í uppgjöri efstu liða í milliriðli þrjú annað kvöld. Liðin eru efst og taplaus í riðlinum.
Átta liða úrslit HM kvenna:
9. desember, Dortmund: Þýskaland – Brasilía.
9. desember, Dortmund: Noregur – Svartfjallaland.
10. desember, Rotterdam: Danmörk – Frakkland eða Holland.
10. desember, Rotterdam: Frakkland eða Holland – Ungverjaland.
