Íslenska landsliðið í handknattleik vann Kongó í úrslitaleiknum um forsetabikarinn á heimsmeistaramóti kvenna í handknattleik í Arena Nord í kvöld, 30:28, eftir að jafnt var í hálfleik, 14:14. Forsetabikarinn fer til Íslands!
Þetta er fyrsti bikarinn sem kvennalandsliðið vinnur í 59 ár og þótt e.t.v. sé hann ekki stærstu sigurlaunin á mótinu þá getur hann haft jákvæð og góð áhrif á landsliðið sem vann síðustu fjóra leikina á mótinu og fer heim með góðar minningar eftir þriggja vikna samveru og 10 kappleiki, fleiri en liðið hefur fengið flest ár um langt árabil.
Leikmenn voru á síðustu metrunum en eftir mikinn barning þá var íslenska liðið skarpara á lokasprettinum og tókst að kría út sigur sem var allt sem skipti máli eftir rúmlega viku veru í Frederikshavn. Ofan á þennan árangur verður hægt að byggja á komandi ári.
Hvað sem gerðist í leiknum þá er það staðreynd að allir fara heim með bros á vör og góðar minningar.
Munum að gleðjast yfir smærri áföngum jafnt sem þeim stærri. Íslenska landsliðið kemur reynslunni ríkara til leiks á EM að ári liðnu.
Til hamingju, leikmenn, þjálfarar og starfsfólk.
Mörk Íslands: Thea Imani Sturludóttir 6, Þórey Rósa Stefánsdóttir 5, Elín Rósa Magnúsdóttir 4, Sandra Erlingsdóttir 4/2, Hildigunnur Einarsdóttir 3, Lilja Ágústsdóttir 2, Sunna Jónsdóttir 2, Andrea Jacobsen 2, Perla Ruth Albertsdóttir 1, Þórey Anna Ásgeirsdóttir 1.
Varin skot: Hafdís Renötudóttir 12, 35,3% – . Elín Jóna Þorsteinsdóttir 4/1, 44,4%.
Handbolti.is var í Arena Nord og fylgdist með leiknum í textalýsingu hér fyrir neðan.
