Stjarnan fór með bæði stigin úr viðureign sinn við ÍBV í Olísdeild kvenna í handknattleik í Vestmannaeyjum eftir mikla baráttu þar sem aðeins einu marki munaði að lokum, 30:29. Stjarnan var með sex marka forskot að loknum fyrri hálfleik, 18:12. Þetta var annað eins marks tap ÍBV-liðsins í röð í deildinni. Með sigrinum komst Stjarnan stigi upp fyrir ÍBV í fjórða sæti með sex stig eftir fimm leiki.
ÍBV var með frumkvæðið framan af leiknum en eftir rúmlega tíu mínútna leik snerist dæmi hressilega við. Leikmenn Stjörnunnar skoruðu 13 mörk gegn aðeins þremur frá Eyjaliðinu sem varð þess valdandi að sex marka munur var að loknum fyrri hálfleik.
Leikmenn ÍBV tóku á sig rögg í síðari hálfleik en það dugði ekki til. Stjarnan lék af klókindum auk þess sem ÍBV-liðið gerði sig sekt um nokkuð af einföldum mistökum.
Mörk ÍBV: Birna Berg Haraldsdóttir 6, Sunna Jónsdóttir 6, Karolina Olszowa 4, Harpa Valey Gylfadóttir 3, Ásta Björt Júlíusdóttir 3, Elísa Elíasdóttir 2, Kristrún Ósk Hlynsdóttir 2, Lina Cardell 2, Hrafnhildur Hanna Þrastardóttir 1.
Mörk Stjörnunnar: Eva Björk Davíðsdóttir 8, Elísabet Gunnarsdóttir 6, Helena Rut Örvarsdóttir 4, Sólveig Lára Kjærnested 3, Katla Magnúsdóttir 3, Anna Karen Hansdóttir 2, Ída Bjarklind Magnúsdóttir 2, Tinna Karen Demian 1, Hanna Guðrún Stefánsdóttir 1.
