Frá ÍBV til Víkings

Tara Sól Úranusdóttir, markvörður úr ÍBV hefur ákveðið að ganga til liðs við Víking og leika með liðinu í Grill 66-deildinni á komandi keppnistímabili.

Tara Sól er 19 ára markmaður, uppalin í Vestmannaeyjum þar sem hún hefur leikið með ÍBV allan sinn feril. Á liðnu tímabili var hún í markvarðarteymi ÍBV í Olísdeildinni og Poweradebikarnum. Tímabilið 2021/2022 stóð hún í marki U-liðs ÍBV í Grill 66-deildinni.

„Við erum gríðarlega spennt yfir því að fá þennan unga og efnilega markmann til liðs við okkur og hlökkum til að sjá hana blómstra í vetur,“ segir í tilkynningu frá Víkingi.