Stevče Alušovski, sem þjálfað hefur stórliðið Vardar Skopje undanfarin tvö ár hefur verið ráðinn þjálfari Þórs á Akureyri samkvæmt heimildum Akureyri.net. Þór leikur í Grill66-deild karla á næsta keppnistímabili.
Alušovski hætti hjá Vardar í vor þegar Veselin Vujovic var ráðinn í þriðja sinn til meistaraliðsins.
Alušovski er 48 ára tók við þjálfun Vardar sumarið 2019 eftir að liðið hafði unnið Meistaradeild Evrópu í annað sinn á þremur árum.
Undir stjórn Alušovski varð Vardar Norður Makedóníumeistari í vor og árið áður auk þess að vinna bikarkeppnina.
Uppfært – Þór staðfestir ráðninguna.
Þór hefur staðfest ráðninguna á heimasíðu sinni.
„Við rennum auðvitað pínu blint í sjóinn en í undirbúningsvinnunni fengum við fagaðila að borðinu með okkur, Stevce er virtur í sínu heimalandi, sagður harður og mjög góður í handboltafræðunum.
Þannig að hvert mannsbarn sem fylgist með handbolta ætti að sjá að Þórsurum er alvara á ferð hvað framtíð handboltans í þorpinu varðar. Það má segja að þeir aðilar sem settust að borðinu eftir síðustu leiktíð hafi einróma ákveðið að nú væri rétti tíminn til að núllstilla félagið og handknattleiksdeildina.
Við erum með ráðningu Stevce einfaldlega að byrja uppá nýtt. Deildin var búin að ræða við nokkra aðila hér innanlands varðandi að taka að sér þjálfun meistaraflokks, en að lokum var þetta of spennandi kostur til að láta ekki slag standa,“ segir m.a. í tilkynningu sem birtist fyrir skömmu á heimasíðu Þórs og er undirrituð af Árna Rúnar Jóhannssyni.
Tilkynninguna er hægt að lesa í heild sinni hér.
