0
„Frábær varnarleikur í 45 til 50 mínútur auk agaðs sóknarleiks þar sem við biðum eftir réttu færunum. Ég er bara mjög ánægður með agann á okkar konsepti í dag,“ sagði Sigursteinn Arndal þjálfari FH í samtali við handbolta.is eftir sigurinn á Aftureldingu, 35:29, í Olísdeild karla í handknattleik að Varmá í kvöld.
Sigurinn var aldrei í hættu og mest náði FH-liðið níu marka forskoti í síðari hálfleik. Sigurinn færði FH-liðið upp í efsta sæti deildarinnar.
„Ég er mjög stoltur af liðinu og hvernig það lék. Það er engin lygi að við erum að koma úr mjög þéttu prógrammi. Þar af leiðandi kemur landsliðspásan sem framundan er sér mjög vel fyrir okkur. Orkan var mikil í liðinu sem er eitt af því sem ég er mjög ánægður með,“ sagði Sigursteinn ennfremur.
Næsti leikur FH í Olísdeildinni verður 14. nóvember á heimavelli gegn KA áður en farið verður til Þýskalands og leikið við Gummersbach í Evrópudeildinni þriðjudaginn 19. nóvember.
Staðan og næstu leikir í Olísdeildum.
Lengra myndskeiðsviðtal er við Sigurstein efst í þessari frétt þar sem m.a. er talað um hvernig FH-liðið hefur svarað inni á leikvellinum eftir skyndilegt brotthvarf Arons Pálmarssonar en það kostaði óneitanlega breytingar á leik þess.
