Fram situr við hlið Vals með fjögur stig eftir tvær fyrstu umferðir Olísdeildar kvenna að loknum naumum sigri á Haukum í hörkuleik í Lambhagahöllinni í Úlfarsárdal í kvöld, 27:26. Haukar skoruðu tvö síðustu mörk leiksins og áttu þess kost að jafna metin á síðustu sekúndum en lánaðist það ekki. Skot Söru Odden fór rétt framhjá marki Fram.
Verður Framliðið að teljast lánsamt að hafa hreppt bæði stigin í leiknum þótt liðið hafi verið komið með þriggja marka forskot tveimur mínútum fyrir lok leiksins.
Staðan var jöfn að loknum fyrri hálfleik, 14:14.
Haukar voru á undan lengst af fyrri hálfleiks áður en Fram tókst að jafna metin með tveimur síðustu mörkunum áður en leiktíminn var úti. Kristrún Steinþórsdóttir skoraði 13. markið og Alfa Brá Hagalín Oddsdóttir sá til þess að jafnt var þegar gengið var til búningsherbergja.
Síðari hálfleikur var jafn og skemmtilegur. Sjaldnast munaði meira en einu marki á annan hvorn veginn þar til líða tók nærri leikslokum og Fram komst þremur yfir og virtist ætla að vinna með sannfærandi mun. Fram tók leikhlé þegar 18 sekúndur voru til leiksloka en tapaði boltanum fljótlega eftir leikhléið. Haukar unnu boltann og tóku leikhlé sem skilaði heldur ekki árangri.
Mörk Fram: Lena Margrét Valdimarsdóttir 9/4, Alfa Brá Oddsdóttir Hagalín 6, Kristrún Steinþórsdóttir 4, Þórey Rósa Stefánsdóttir 3, Erna Guðlaug Gunnarsdóttir 3, Hildur Lilja Jónsdóttir 1, Steinunn Björnsdóttir 1.
Varin skot: Darija Zecevic 11, 40,7% – Andrea Gunnlaugsdóttir 3, 23,1%.
Mörk Hauka: Elín Klara Þorkelsdóttir 9/1, Alexandra Líf Arnarsdóttir 5, Rut Arnfjörð Jónsdóttir 3, Ragnheiður Ragnarsdóttir 2, Ragnheiður Sveinsdóttir 2, Inga Dís Jóhannsdóttir 1, Sara Odden 1, Sara Katrín Gunnarsdóttir 1, Rakel Oddný Guðmundsdóttir 1, Sonja Lind Sigsteinsdóttir 1.
Varin skot: Sara Sif Helgadóttir 7, 21,2% – Elísa Helga Sigurðardóttir 0.
Öll tölfræði leiksins hjá HBStatz.
Staðan og næstu leikir í Olísdeildum.
