Fram tókst í kvöld að hefna tapsins fyrir Selfossi í 16-liða úrslitum Poweradebikarsins í handknattleik á síðasta ári með öruggum sjö marka sigri gegn liði Selfoss í Sethöllinni á Selfossi í kvöld, 26:19. Framarar tóku öll völd á leikvellinum fljótlega í síðari hálfleik eftir að hafa verið marki yfir að loknum jöfnum fyrri hálfleik, 10:9. Viðureignin var sú fyrsta í 16-liða úrslitum í kvennaflokki bikarkeppninnar.
Fram er þar með komið í átta liða úrslit Poweradebikarsins, bikarkeppni HSÍ. Selfoss er á hinn bóginn úr leik eftir að hafa komist tvö síðustu ár í undanúrslit.
Leikurinn var áfram jafn á upphafsmínútum síðari hálfleiks. Eftir að Katla María Magnúsdóttir jafnaði metin fyrir Selfoss 12:12 eftir liðlega sjö mínútur tók við 15 mínútna kafli hjá heimaliðinu þar sem það skoraði aðeins tvö mörk gegn 11 mörkum Fram.
Átta mínútum fyrir leikslok var Fram með níu marka forskot, 23:14, og ljóst að viðureigninni yrði ekki snúið upp í sigur af hálfu Selfossliðsins þótt leikmönnum þess sé ýmislegt til lista lagt.
Vissulega var skarð fyrir skildi um tíma að Katla María var fjarverandi eftir að hafa fengið höfuðhögg svo blæddi úr á eftir. Hún mætti til leiks á ný áður en leiktíminn var úti.
Mörk Selfoss: Katla María Magnúsdóttir 6, Perla Ruth Albertsdóttir 6/3, Arna Kristín Einarsdóttir 3, Hulda Dís Þrastardóttir 2, Eva Lind Tyrfingsdóttir 2.
Varin skot: Cornelia Linnea Hermansson 11/1, 34,3% – Ágústa Tanja Jóhannsdóttir 2, 33,3%.
Mörk Fram: Lena Margrét Valdimarsdóttir 8/2, Steinunn Björnsdóttir 5, Alfa Brá Hagalín 4, Karen Knútsdóttir 3/2, Íris Anna Gísladóttir 3, Þórey Rósa Stefánsdóttir 2, Berglind Þorsteinsdóttir 1.
Varin skot: Darija Zecevic 14, 45,2%.
Tölfræði HBStatz.
16-liða úrslit Poweradebikarsins annað kvöld:
Kórinn: HK – ÍBV, kl. 18.
Safamýri: Víkingur – Fjölnir, 19.30.
