Fram hefur áfram augastað á öðru sæti Olísdeildar kvenna í handknattleik eftir sigur á Haukum, 23:19, í viðureign liðanna Lambhagahöll Framara í dag. Eftir erfiðan fyrri hálfleik þá sprakk Framliðið út í síðari hálfleik og réði lögum og lofum. Haukar voru þremur mörkum yfir í hálfleik, 11:8.
Fram og Haukar eru jöfn að stigum eftir leikinn í dag. Hvort þeirra hefur 26 stig. Haukar eiga leik inni gegn ÍBV. Annars eru þrjár umferðir eftir þegar leikjum dagsins í Olísdeildinni verður lokið.
Fram átti í mestu vandræðum með sóknarleik sinn í fyrri hálfleik. Mun betur gekk í þeim síðari enda skoraði liðið 15 mörk. Sóknarleikur Hauka var að sama skapi ekki góður í leiknum og munaði þar miklu að Elín Klara Þorkelsdóttir gat ekki beitt sér af fullum þunga allan leikinn.
Lena Margrét Valdimarsdóttir lék með Fram á ný í dag eftir að hafa verið frá keppni síðan í upphafi árs þegar hún handarbrotnaði. Lena á enn nokkuð í að vera komin í leikæfingu enda losnaði hún fyrst við umbúðirnar um höndina í upphafi vikunnar.
Staðan og næstu leikir í Olísdeild kvenna.
Mörk Fram: Berglind Þorsteinsdóttir 6, Harpa María Friðgeirsdóttir 6, Alfa Brá Hagalín 3, Elna Ólöf Guðjónsdóttir 3, Kristrún Steinþórsdóttir 2, Þórey Rósa Stefánsdóttir 2, Erna Guðlaug Gunnarsdóttir 1.
Varin skot: Andrea Gunnlaugsdóttir 14.
Mörk Hauka: Sara Odden 4, Elín Klara Þorkelsdóttir 4, Ragnheiður Ragnarsdóttir 3, Inga Dís Jóhannsdóttir 2, Sara Katrín Gunnarsdóttir 2, Alexandra Líf Arnarsdóttir 1, Berglind Benediktsdóttir 1, Birta Lind Jóhannsdóttir 1, Ragnheiður Sveinsdóttir 1.
Varin skot: Margrét Einarsdóttir 16.
Tölfræðin hjá HBStatz.
