Fram fylgdi í kjölfar FH í kvöld og vann sér sæti í undanúrslitum úrslitakeppni Olísdeildar karla í handknattleik. Fram lagði Hauka, 28:25, í annarri og síðari viðureign liðanna á Ásvöllum í kvöld. Staðan var jöfn, 13:13, í hálfleik. Haukar hafa þar með lokið keppni en tímabilið varð endasleppt hjá liðinu, tap í átta liða úrslitum Evrópubikarkeppninnar og síðan tveir tapleikur fyrir Fram í átta liða úrslitum.
Leikurinn á Ásvöllum var jafn og spennandi frá upphafi til enda. Bæði lið léku ágætan varnarleik en sóknarleikurinn var fyrir vikið á tíðum erfiður. Aron Rafn Eðvarðsson var frábær í marki Hauka í það sem hermt er hafa verið kveðjuleikur hans. Aron Rafn hélt Haukum inni í leiknum.
Framarar stóðust pressuna frá leikmönnum Hauka sem þurftu að leggja allt í sölurnar til þess að ná í oddaleik. Drógu Haukar hvergi af sér sem varð til þess að brottrekstrar og rauð spjöld sáust á lokamínútunum. Sóknarleikurinn varð Haukum að falli.
Vel gert hjá leikmönnum Fram og þjálfurum liðsins sem róteruðu mjög á liðinu frá fyrstu mínútu til þeirra síðustu.
Breki Hrafn Árnason stóð í marki Fram síðustu mínúturnar og átti fína innkomu.
Mörk Hauka: Geir Guðmundsson 6, Össur Haraldsson 5/2, Birkir Snær Steinsson 3, Þráinn Orri Jónsson 3, Sigurður Snær Sigurjónsson 2, Brynjólfur Snær Brynjólfsson 1, Skarphéðinn Ívar Einarsson 1, Andri Fannar Elísson 1, Hinrik Hugi Heiðarsson 1, Hergeir Grímsson 1/1.
Varin skot: Aron Rafn Eðvarðsson 19, 40,4%.
Mörk Fram: Reynir Þór Stefánsson 9, Ívar Logi Styrmirsson 6/3, Rúnar Kárason 4, Marel Baldvinsson 3, Eiður Rafn Valsson 2, Erlendur Guðmundsson 2, Dagur Fannar Möller 1, Magnús Öder Einarsson 1.
Varin skot: Arnór Máni Daðason 10, 31,3% – Breki Hrafn Árnason 4, 57,1%.
Tölfræði leiksins hjá HBStatz.
