Handknattleiksmaðurinn Hákon Daði Styrmisson hefur skrifað undir framlengingu á samningi sínum við þýska liðið Vfl Gummersbach. Nýr samningur gerir ráð fyrir að Eyjamaðurinn ungi verði í herbúðum Gummersbach fram til ársins 2024. Fyrri samningur var til tveggja ára en Hákon Daði gekk til liðs við Gummersbach í sumar sem leið.
Óhætt er að segja að Hákon Daði hafi staðið sig afar vel með Gummersbach liðinu. Hann er á meðal markahæstu leikmanna 2. deildar. Gummersbach er í efsta sæti deildarinnar eftir sigur á Tusem Essen í gær og er einnig komið í 16-liða úrslit í bikarkeppninni.
„Ég er mjög ánægður með að hafa framlengt samning minn við félagið og vera þar með liðsmaður félagsins næstu árin. Ég hlakka til framtíðarinnar,“ sagði Hákon Daði m.a. á vef Gummersbach í gær þegar greint var frá framlengingunni.
Haft er eftir Guðjóni Val Sigurðssyni þjálfara Gummersabach í tilkynningu félagsins að það sé gleðilegt hversu fljótt Hákon Daði hafi skotið rótum innan félagsins. Af þeim sökum hafi verið afar mikilvægt að tryggja lengri veru hans innan félagsins en fyrri samningur gerði ráð fyrir.
