„Frammistaðan var ekki nógu góð hjá okkur að þessu sinni. Að sama skapi vil ég hrósa ÍR-liðinu. Mér fannst það spila frábærlega og loka vel á okkur varnarlega,“ sagði Rakel Dögg Bragadóttir þjálfari Fram eftir jafntefli, 20:20, við ÍR í Olísdeild kvenna í handknattleik í Skógarseli í dag.
Of margir tæknifeilar
„Við vorum í brasi í sóknarleiknum þó síðari hálfleikurinn hafi verið betri. Fyrri hálfleikur var bara mjög slakur af okkar hálfu, jafnt í vörn sem sókn. Okkur tókst að þétta betur vörnina í síðari hálfleik enda var lítið skorað. Auk þess vorum við með of marga tæknifeila,“ sagði Rakel Dögg en staðan var 13:11 fyrir ÍR þegar fyrri hálfleikur var að baki
Áframhaldandi vinna
„Fyrir okkur liggur að halda áfram vinnunni, einna helst við sóknarleikinn með það að markmiði að halda áfram að bæta okkur, taka framförum. Um leið förum við inn í alla leiki með virðingu fyrir andstæðingnum en reynum um leið að einbeita okkur að okkur sjálfum,“ sagði Rakel Dögg Bragadóttir þjálfari Fram sem er í öðru sæti Olísdeildar með sjö stig eftir fimm leiki, þremur stigum á eftir Val sem er efstur og stigi ofar en Haukar sem sitja í þriðja sæti.
ÍR er í sjöunda og næst neðsta sæti með tvö stig.
Staðan og næstu leikir í Olísdeildum.
