Norður Makedóníumaðurinn Stevče Alušovski, sem þjálfaði karlalið Þórs á Akureyri frá sumrinu 2021 þangað til í lok nóvember á síðasta ári, hefur fengið starf í heimalandi sínu. Hann tekur við þjálfun karlaliðs GRK Ohrid sem hefur bækistöðvar í bænum Ohrid. Liðið hafnaði í sjötta sæti úrvalsdeildarinnar á leiktíðinni en ætlar sér stærri hluti á þeirri næstu. Alušovski hefur skrifað undir þriggja ára samning.
Talsverð uppstokkun virðist standa yfir á leikmannahópi GRK Ohrid fyrir komandi leiktíð ef marka má Wikipedia-síðu félagsins.
GRK Ohrid komst á koppinn 2011 og hefur leikið í efstu deild í Norður Makedóníu síðasta áratuginn. Liðið hefur best náð öðru sæti í deildarkeppninni 2016.
Áður en Alušovski var óvænt ráðinn til Þórs sumarið 2021 var hann við stjórnvölin hjá stórliði Vardar Skopje. Þar áður var hann þjálfari hjá RK Pelister og RK Eurofarm Rabotnik.
Alušovski lék á sínum tíma 245 landsleiki fyrir Norður Makedóníu frá 1993 til 2013 og skoraði í þeim 967 mörk og því vel þekktur í heimalandi sínu.
