Tveir leikmenn kvennalandsliðsins í handknattleik, Elísa Elíasdóttir, ÍBV, og Katla María Magnúsdóttir frá Selfossi, náðu í gær áfanga á ferli sínum með landsliðinu þegar leikið var við pólska landsliðið í fyrstu umferð Póstbikarmótsins, Posten Cup, í Noregi í Boligpartner Arena í Hamri.
Katla María lék sinn fyrsta A-landsleik í gær. Hún fékk tækifæri á síðustu mínútum leiksins. Þar með eiga allir leikmennirnir 18 í HM-hópnum a.m.k. einn A-landsleik.
Katla María var kölluð inn í landsliðið á þriðjudaginn þegar ljóst var að Elín Klara Þorkelsdóttir, úr Haukum, væri það alvarlega meidd að hún gæti ekki tekið þátt í HM um mánaðarmótin.
Elísa Elíasdóttir skoraði sitt fyrsta A-landsliðsmark í leiknum við Pólverja í Noregi í gær. Hún skoraði 22. mark Íslands skömmu fyrir leikslok, 22:28. Elísa, sem er 19 ára gömul, var að leika sinn fimmta A-landsleik.
Næsti leikur Íslands á mótinu verður á morgun, laugardag, gegn heims- og Evrópumeisturum Noregs sem unnu Angóla, 32:24, í viðureign sem fram fór í kjölfar leiks Íslands og Póllands. Pólverjar unnu leikinn, 29:23.
Leikur Noregs og Íslands á morgun hefst klukkan 15.45 og verður sendur út hjá RÚV auk þess sem handbolti.is fylgist með í textalýsingu.
